Letters: Others were too scared to run for Atiu

Monday November 11, 2019 Published in Letters to the Editor
June Baudinet, the Democratic Party candidate for Tengatangi-Areora-Ngatiarua seat. 19110878 June Baudinet, the Democratic Party candidate for Tengatangi-Areora-Ngatiarua seat. 19110878

Me ka tika iakoe e te Etita o te Cook Islands News kia tuku atu koe I taku pepa ki roto I taau nuti pepa no apopo i te Maanakai

Kia Orana e taku iti Tangata Atiu, ae, e taku Iti Tangata Atiu, no te mea, te ta’e nei to toto I roto I toku au melo ta te Mana Teitei I akakorona iaku, kare e rauka i te kopae ke.

Te mea mua, kua tae te pati’anga kiaku, ko au te tangata openga I pati ia mai.

Kua pati’ia tetai au tangata e noo nei ki runga iakoe e Enuamanu kia tu, kua patoi ra ratou I teia pati’anga.

Teia tetai au tumu I raro ake.

* Mataku i te kopu tangata e tetai au tangata I runga i te enua;

* Ta ratou angaanga , ko te ruti ratou I te reira;

* To ratou tao’anga, ko te kiritia to ratou tao’anga.

Te vai atura tetai au tumu I kore ei ratou I ariki i te pati’anga.

Kua tae te pati’anga kiaku, e kua tangi au iakoe e Enuamanu, koai ka tu noou?, koai te Tumutoa ka amo I teia apainga teimaa? Kua kimikimi au I toku manako, kua tukia toku ngakau, ko te tumu teia I ariki ei au I teia pati’anga.

Kua kite katoa au e, ka tuatua ia au, ka akakino ia au,ka akavaavaa ia au mei tei tata ia I roto i te pepa, noatu ra te reira, kare o te riri puapinga, kare o te tupaupau riri puapinga, ka vai rai toku aroa e toku Inangaro iakoe e Enuamanu I roto I toku ngakau.

Ko te Atua anake tei kite i te ngakau o te tangata ravarai. Koia anake, ka tau i te akava ia tatou katoatoa. Me kua ara au I mua iaia I taku I tuatua au, koia toku Akava Maata.

No reira e taku iti tangata Enuamanu, taku ivi, taku toto, ariki mai I toku reo tatara’ara mate akaaka I toku ngakau kia kotou katoatoa, me kua mamae kotou I taku I tuatua, te mamae kapiti nei tatou.

Kia riro ra to tatou Oa Tumanava ko Iesu ei apai ke I to tatou mamae, e te tamaru I to tatou ngakau katoatoa. Kia vai mai te Au o to tatou Atu ko Iesu ki rungao iakoe e Enuamanu i te au ra ka aaere ia e tatou ki mua.

Te Atua te Aroa

June Taringa Baudinet

Democratic Party

Leave a comment